“सतीशया सः–संगीतया जः” झीगु न्ह्यःने सतीश महर्जनया किचः

‘नुगलय् घाः यानाः मतिनाया ल्वय् बियाः न्हिला न्हिला छ वन जितः ख्वयेका…’ थ्वहे म्येपाखें संगीत ख्यलय् गायक सतीश महर्जन धकाः म्हसीका बिइत ताःलात । थ्वहे म्ये गायक सतीश महर्जनया म्हसीका म्ये जुल । अझ धाये थ्वहे म्ये गायक सतीश महर्जनया दकले न्हापांगु रिकर्डेड म्ये जुल ।
खः थ्व म्ये ने.सं. ११२० पाखे गुडनाइट एफएमपाखें पिदंगु ‘हावलासा’ म्येचाः दुने दुथ्याःगु म्ये खः । अले गुड नाइट एफएमया काउनडाउनय् आपालं ई टप टेनय् ल्यू लाइगु म्ये खः थ्व । थ्वहे म्ये संगीत ख्यलय् सतीशया म्हसीका जुल ।
थ्व म्ये किपूया ३ वडा कुतिसा त्वाःया नांजाःम्ह बरिष्ठ संगीतकःमि ज्ञानेश्वर निभाः महर्जनया लसय् किपू १० चिथु इछेँ त्वाःया ललेन्द्र शाक्यया च्वसां पिज्वःगु म्ये खःसा अल्फा रिकर्डिङ्ग स्टुडियो छाउनीया रविन दर्शनधारीं संगीत संयोजन यानादीगु म्ये खः ।
खय्तला २०५० सालपाखे दकले न्हापां सतीश महर्जनं ‘जि वइगु लँपु स्वयाच्वन ज्वी’ बोलया किजापूजाया म्ये ज्ञानेश्वर निभाःया च्वसाय् व लसय् रिकर्ड लाःयाःगु खः, तर सार्वजनिक धाःसा मजुल । उगु म्ये छगू नाटकया नितिं रेकर्ड जूगु खः । तर, पिहाँ मवल । थ्व ल्याखं ‘नुगलय् घाः यानाः’ म्ये हे सतीशया न्हापांगु म्ये कथं पिलू वल ।
खय्तला, थ्व ‘नुगलय् घाः याना मतिनाया ल्वय् बिया न्हिला न्हिला छ वन जितः ख्वयेका…’ म्ये धुंकाः सतीशया सांगितिक यात्राय् सदां तिमिला जवय् लाः कथं म्ये हालेगु ख्यलय् निरन्तरता थाय् काल, आःतक नं कया हे च्वंगु दु । गायक सतीश महर्जनं आःतकया दुने सलंसः म्ये हालादिल । म्ये हालेगु क्रम मदिक्क न्ह्याना च्वंगु हे दनि ।
गायक सतीश महर्जन किपू नगरपालिका ५ वडा दीख्यः पांगाय् अबु कृष्णलाल महर्जन व मां दुर्गादेवी महर्जनया कोखं जन्म जुयादीम्ह खःसा सतीश स्वम्ह काय् मध्ये माहिलाम्ह काय् खः ।
थः अबु कृष्णलाल महर्जन भजन म्ये हालीम्ह स्थानीय उस्ताद खः । थःगु छेँय् हार्मोनियम तबला दूगुलिं मचांनिसें हे संगीतय् नुगः क्वसाःम्ह खः सतीश ।
सतीशं संगीत ख्यलय् पलाः तयादीगु इलय् सुरु सुरुइ तबला थायेगु यानादिल लिपा म्ये नं हालेगु पलाः न्ह्याकादिल ।
मचांनिसें हे थीथी भजन मण्डल फल्चाय् भजन हालेत वनीम्ह खः सतीश । छेँय् फुर्सद दतकि पासापिंलिसे नापं च्वना म्ये हालेगु याइगु खः ।
अग्रज संगीतज्ञ दाजुपिंपाखें प्रभावित जूगु खँ न्ह्यथनादिसें सतीशं संगीतज्ञ रामकृष्ण दुवाल, बासुदेव डंगोल गुन्द्रु, राजु महर्जन जः, ज्ञानेश्वर महर्जन निभाः, न्हुच्छे दर्शनधारीपिनिगु सांगितिक हःपाःलं थः प्रभावित जुयागु खँ कनादी ।
वि.सं. २०४९ सालपाखे थःगु त्वाः पांगाया दीख्यलय् इकोस्टार क्लब पलिस्था यानाः थीथी सांस्कृतिक ज्याझ्वः ग्वसाः ग्वयेगु यात सतीश महर्जनं थः त्वाःबाःया पासापिंलिसे जाना । अथेहे, क्लबपाखें देउसी भैलो म्हितेगु नं यात ।
संगीत ख्यलय् सतीशं थः दकले न्हापांम्ह गुरु थः अबु कृष्णलाल महर्जनयात नालादीगु दु ।
संगीतज्ञ रामकृष्ण दुवाःपाखें प्रारम्भिक संगीतया ज्ञान काये धुंकाः २०५३ सालनिसें शास्त्रीय संगीत गुरु प्रभुराज ढकालयाके शास्त्रीय संगीत सयेकादिल ।
खय्तला सतीशं नांजाःपिं संगीतकःमिपिं शिलाबहादुर मोक्तान व कुन्ती मोक्तानपाखें नं प्रारम्भिक संगीतया ज्ञां कयादीगु दु ।
शास्त्रीय संगीतया परीक्षा सिनियर डिप्लोमाय् सर्वोकृष्ट ल्याः हयाः उत्तीर्ण यानादिल सतीशं ।
वधुंकाः खुक्वःगु दँया परीक्षा बी. म्यूज य् नं बांलाःगु ल्याः हयाः उत्तीर्ण यानादिल सतीश महर्जनं ।
सतीशं २०५२÷०५३ सालनिसें थीथी रेष्टुरेन्टय् गजल गायकया रुपं पलाः न्ह्याकादिल । अथेहे, २०५५ सालय् वाइजीजी कलाकेन्द्रया पलिस्था जूबलय् गायन प्रशिक्षकया रुपं ज्या यानादिल ।
संगीतकःमि सतीश महर्जनं दँबदँतक वाइजीजी कला केन्द्रय् संगीत गुरु जुया नं ज्या यानादीगु दु । वय्कः संगीत गुरु सतीश महर्जनपाखें किपूया नांजाःम्ह म्येहालामि रत्नशोभा महर्जनं नं संगीतया ज्ञां कयादीगु दुसा सतीशया संगीत प्रशिक्षणपाखें आपालं म्येहालामिपिं पिलू वःगु दु ।
रेष्टुरेन्टय् गजल हालेगु निसें थीथी स्कुलय् नं संगीत शिक्षकया रुपं ज्या यानादिल ।
सतीश महर्जन, थौंकन्हय् थीथी स्कुलय् संगीत शिक्षक जुयाः नच्चापिं संगीतकःमिपिं उत्पादन यायेगु पलाः छिनाच्वनादीगु दु ।
गथेकि, किपूया पुष्पसदन स्कूल व क्रिएटिभ एकेदेमिलिसें येँया स्वर्णिम स्कूल व न्यू जेनिथ स्कूलय् सतीश महर्जन संगीत शिक्षक जुयाः ज्या यानाः वयाच्वंगु दु । उगु प्यंगू स्कूलय् सतीश महर्जनपाखें संगीतया ज्ञान कयाच्वंपिं आपालं मस्त विद्यार्थीपिं दु । उपिं विद्यार्थीपिन्सं नुगः क्वसायेकाः सतीश महर्जनपाखें संगीतया ज्ञान कयाच्वंगु दु, अले कन्हय् थीगु नगु कथं संगीतया सर्गतय् ब्वयेगु आज्जु कयाच्वंगु दु । विद्यार्थीपिनिगु उगु आज्जु पूवंकेगु कुतलय् सतीश महर्जन छम्ह स्येल्लाःम्ह प्रशिक्षक कथं न्ह्यलुवाः जुयाः पलाः छिनाच्वंगु दु ।
संगीत प्रशिक्षकया लिसेलिसें सतीश महर्जनं थःगु हे छेँय् होम स्टुडियो संचालनय् हया संगीत ख्यःयात निरन्तरता बिइगु पलाः छिनादीगु दु । संगीत संयोजकया रुपं नं ज्या यानाच्वनादीगु दु । सतीश महर्जन स्थानीय संगीत ख्यलय् दीख्यः त्वाः पांगाया श्री बालकुमारी दाफा खलः दुने दाफा म्ये गुरु जुयाः च्वनादीगु दु । परम्परागत दाफा संगीतया विकासया नितिं पलाः न्ह्याकाः च्वनादीगु दु ।
प्रयाग संगीत समिति इलाहाबादपाखें शास्त्रीय संगीत गायनय् बि.म्यूज यानादीम्ह गायक सतीश महर्जनया नेपालभाषा व खस नेपाली भाषाया यानाः आपालं सांगितिक एल्बम पिदने धुंकूगु दु ।
सतीश महर्जनं सांगितिक भ्रमण कथं भारतया दार्जिलिङ, गुजरात, ताइवान झायेधुंकूगु दु । अथेहे सतीश महर्जनं २०५६÷०५७ सालपाखे मदुम्ह संगीतकःमि नवीन महर्जनया संगीतय् पिदंगु नेपालभाषाया ‘पासा’ एल्बमय् प्यपु म्येय् सः बियादीगु दु सतीश महर्जनं ।
अथेहे, २०५९ स ‘नुगःस्वाँ’ याकः म्येचाः पिदन, निसलिं अय्लाः पिदन । २०६४ स पर्फेक्ट खस नेपाली म्येचाः पिदन । २०७० स झझल्को व गजल प्रवाह म्येचाः पिदन ।
सतीश महर्जनया सः दुथ्याःगु आपालं नेपाली, नेपालभाषा कलेक्सन एल्बमत आपालं पिदंगु दु ।
‘यो कस्तो प्रेम’, ‘एक पलको जीवन’ नांया संकिपाय् नं सतीश महर्जनं म्ये हालादीगु दु ।
सतीशं नेपालभाषाया लोकंह्वाःगु बौद्ध जातक बाखंया लिधंसाय् दयेकातःगु संकिपा ‘पटाचारा’य् जितः यःम्ह छम्ह दुमस्यू जिं वं गन दु म्ये नं हालादीगु दु ।
सतीशं थीथी नेपालभाषा संकिपाय् थःगु सः दुथ्याकादीगु दु ।
गायक सतीश महर्जनं बि.सं. २०६६ सालपाखे नेपालभाषा एकेदेमिपाखें च्वछायेबहःगु दान्यहिरा सिरपाः कयादीगु दुसा बि.सं. २०६४ सालय् ईमेज अवार्ड, बि.सं. २०७३ सालय् श्री कृष्णबहादुर मानन्धर लुमन्ति कोषपाखें सम्मान, सन् २०२२ स निक्वःगु स्टार म्यूजिक अवार्ड २०२२ थें जाःगु सिरपाः व अवार्ड कयादीगु दु । सतीश महर्जनं सन् २००० व २००१ या गायनपाखे सिनियर डिप्लोमा परीक्षाय् सर्वोत्कृष्ट ल्याः हयाः पास यानादीगुलिं संगीतविद् स्व. गोविन्दधर जोशीया पूण्य स्मृतिइ पलिस्था याःगु स्व. गोविन्दधर जोशी स्मृति पुरस्कार नं कयादीगु दु ।
अथेहे, सतीशं कृष्ण प्रणामी भजन कासाय् न्हाप सिरपाः त्याकादीगु दुसा शास्त्रीय गायन कासाय् ल्यू सिरपाः त्याकादीगु दु ।
२०५२ सालपाखें नच्छेगल्ली युथ क्लबपाखें ग्वसाः ग्वःगु नेवाः म्ये धेंधेंबल्ला कासाय् न्हाप लात सतीश महर्जन इकोस्टार क्लबपाखें ब्वति कया ।
२०५२ सालय् सतीशं रेडियो नेपालपाखें स्वर परीक्षा पास यानाः दसिपौ कयादिल । अथेहे, रेडियो नेपालपाखें ग्वसाः ग्वःगु आधुनिक म्ये कासाय् नं ब्वति कयादिल सतीश महर्जनं । सतीश महर्जनया रेडियो नेपालय् थ्यंमथ्यं छगू दर्जन म्ये रेकर्ड जूगु दु ।
गायक सतीश महर्जन नेपालभाषा व खस नेपाली सांगितिक क्षेत्रया छम्ह लोकंह्वाःम्ह गायक व संगीतकार खः । सतीशं आपालं आधुनिक, संवेगात्मक लिसें लोकप्रिय नेपालभाषाया म्येय् थःगु सुमधुर सः बियादीगु दु । अथेहे, वय्कः थीथी सांगितिक ज्याझ्वलय् नं सक्रिय रुपं सहभागी जुयाः वयाच्वनादीम्ह संगीतकःमि खः ।
गायक सतीश महर्जनया सांगितिक लागाय् मू विधा धैगु नेपालभाषा व खस नेपाली भाषाया सुगम संगीत व लोक म्ये खः । गायक सतीश महर्जनं नांजाःपिं आपालं म्येहालामिपिंलिसे ज्वःम्ये हालादीगु दु । गथेकि, रत्नशोभा महर्जन, सरस्वती मानन्धर, पवित्र कसाः, विश्व नेपाली, दीपा महर्जन, निशा देशार, सपना श्री, सरिता शाही, रिता महर्जन, कोमल राजभण्डारी, लोचन भट्टराई, टीका प्रसाई, बानिका प्रधान, मेलिना राई इत्यादी म्येहालामिपिंलिसे ज्वःम्ये हालादीगु दु । अथेहे, न्हूप्रतिभापिन्त प्रोत्साहन बिइकथं न्हूप्रतिभा म्येहालामि एकता महर्जनलिसे नं सतीश महर्जनं भुवन महर्जनया च्वसाय् व लसय् न्हूगु ज्वःम्ये हालादीगु दु ।
सतीशं म्ये हालेगु नापनापं म्येलसय् हनेगु ज्या नं यानादीगु दु । गथेकि, दच्छि न्ह्यः पिदंगु कुलबहादुर महर्जनया च्वसाय् रत्नशोभा महर्जनया सलय् लोकंह्वाःगु म्ये ‘कुचुकुचु मिनावल’ लसय् हनादिलसा आः नकतिनि जक कुलबहादुर महर्जनया हे च्वसाय् रत्नशोभा व सतीशया सलय् अले सतीशया लसय् ‘थिकुथिकु’ म्ये पिदंगु दु ।
खयतला, सतीश महर्जनया आपालं आपाः हे लोकंह्वाःगु म्येत दु । थन न्ह्यथनाः साध्य मजुइफु ।
अन्तय्, थौंया दिं झी सकलसिगु नितिं छगू अविस्मरणीय दिं खः । थौं झीगु ‘नवप्रतिभायात प्रोत्साहन, अग्रजयात सम्मान ः झीगु कला संस्कृति, राष्ट्रया मौलिक पहिचान’ धैगु सः थ्वयेकाः वयाच्वनागु नेपाल कला संस्कृति उत्थान समाजं वय्कः गायक सतीश महर्जनं संगीत ख्यलय्यानादीगु योगदानयात च्वछासें वय्कःया याकः संगीत सनिल ११४६ ‘सतीशया सः, संगीतया जः’ ज्याझ्वः न्ह्यब्वःसें वय्कः सतीश महर्जनयात छिकपिं सकल हनेबहःपिं स्वकुमिपिनिगु न्ह्यःने तःजिक हनेगु नं ग्वसाः ग्वयाच्वना । सतीश महर्जनया जीवनय् सदां तिमिला जवय् खयेमा । सांगितिक यात्रा मदिक्क न्ह्यानाच्वने फयेमा । सतीश महर्जनया वि.सं. २०६४ सालपाखे राधिका क्षेत्रीलिसे ब्याहा जुल । थौंकन्हय् सतीश व राधिकाया छम्ह काय् दी, मनन । सतीशया सः संगीतया जः । जय संगीत, जय सतीश ।
ललेन्द्र शाक्य
सचिव
नेपाल कला–संस्कृति उत्थान समाज