भक्तपुरबाट तोरीको तेललाई ब्राण्डीङ्ग गरिने, अध्ययन समितिको संयोजकमा न्हुच्छेरत्न मानन्धर

३ माघ २०७८ ।
केके मानन्धर, भक्तपुर ।

भक्तपुरका मानन्धर समुदायले लोप हुने स्थितिमा पुगेको स्थानिय उत्पादन तोरीको तेललाई ब्राण्ड बनाउनको लागि छलफल कार्यक्रम सम्पन्न गरेको छ । भक्तपुर चेम्बर अफ कमर्सले प्रबर्द्धन गर्ने भएपछि करिव हराइसकेको परम्परागत पेशालाई पूनरुत्थान गर्न भक्तपुरका मानन्धरहरू अघि सरेका हुन् ।

भक्तपुर जिल्ला मानन्धर युवा संघको अगुवाइमा गत शनिबार सम्पन्न गरेको प्रारम्भिक चरणको कार्यक्रममा भक्तपुर, मध्यपुर तथा सूर्यविनायक नगरपालिकाका विभिन्न टोलमा बसोबास गर्दै आएका मानन्धरहरू सहभागी थिए ।

“लोप हुने तरखरमा रहेको मानन्धर समुदायको पुर्ख्यौली पेशाको रूपमा रहेको तोरीको तेल उत्पादन गर्ने घरेलु उद्योगलाई अब सामुहिक लगानीमा कम्पनीको रूपमा विकास गर्छाैं ।” भक्तपुर चेम्बरका अध्यक्ष न्हुछेरत्न मानन्धरले जनाए । साना उद्योगको रूपमा रहेको तोरीको तेल उत्पादन गर्ने पेशा पुँजी तथा कच्चा पदार्थको अभाव, मौलिक उत्पादनको गुणस्तर सम्बन्धिको गुणदोष बुझाउन नसकेर आधुनिक बजारबाट लोप हुँदै गएको उहाँको दाबी छ ।

भक्तपुरको गोमारी टोलमा सम्पन्न कार्यक्रममा पुर्ख्यौली पेशा अँगाल्दै आएका साःकोलान टोल, टेखाच्व, तःपालाछि, गोमारी तथा मध्यपुरको चोडे टोलका व्यवसायीहरू सहभागी थिए । दोस्रो चरणमा गरिने कार्यक्रममा अन्य व्यवसाय गर्दै आएका व्यवसायीहरूलाई समेट्ने बताइएको छ ।

हुनपनि भक्तपुरमा स्थानिय उत्पादनलाई ब्राण्ड बनाउनको लागि अरू संघसंस्थाहरूले पनि प्रयास गरिरहेका छन् । भक्तपुरको जुजु धौ, कालो टोपी, ह्याण्डीक्राफ्ट, लोकल रक्सी, चिउरा, चाकु लगायतका स्थानिय उत्पादनलाई करको दायरमा ल्याएर वैध बनाउँदै लानुपर्ने देखिन्छ । सरकारी नीति तथा प्रोत्साहन अभावले करिव उस्तै उत्पादनहरू विदेशबाट आयात गरि उपभोग गर्दा नेपाली मुद्रा विदेशिएका छन् । जुन राष्ट्रहितमा छैन । अब त्यस्ता उत्पादनलाई वैध बनाएर उद्योगको रूपको विकास गर्नसके रोजगारी सिर्जना गरी स्थानिय उत्पादनले अन्तर्राष्ट्रिय बजारमा समेत प्रतिस्पर्धा गर्न सक्ने देखिन्छ ।

भक्तपुर चेम्बरले जिल्लाका जुझारू युवाहरूलाई समेटेर परम्परागत पेशालाई लोप हुनबाट बचाउने अभियानै सञ्चालन गर्ने योजना बनाएको छ । त्यसैले पुर्ख्यौली पेशाको रूपमा रहेको तोरीको तेल उत्पादन, बजारीकरण तथा ब्राण्ड बनाउनको लागि संघले अध्ययन समिति बनाएको छ । समितिले सरोकारवाला पक्षलाई सहभागी गराएर कार्यक्रम सम्पन्न गरेको हो ।

न्हुछेरत्न मानन्धरको संयोजकत्वमा तोरीको तेल उत्पादन सम्बन्धी अध्ययन समिति गठन पनि गरेको छ । जसमा बाबुकाजी मानन्धर, रामबहादुर मानन्धर, ज्ञानेन्द्र मानन्धर, उमेश मानन्धर, आनन्द मानन्धर र राजेश मानन्धर सदस्य रहेका छन् ।

कार्यक्रममा पुर्ख्यौली पेशा अंगालेका व्यवसायीहरूमा साःकोलान टोलबाट आशाकाजी, हिराकाजी, देव, शम्सेर, राजु; गोमारी टोलबाट रामबहादुर, राजेश, गणेश बहादुर, रामसुन्दर; तःपालाछि टोलबाट प्रकाश, आशाकाजी; टेखाच्व टोलबाट लक्ष्मी; चोडे टोलबाट रत्नकाजी तथा भक्तपुर जिल्ला मानन्धर युवा संघका कार्यसमिति पदाधिकारी तथा सदस्यहरु बर्तराम, राजकुमार, राजेश, रमेश मानन्धर लगायतको सहभागिता रहेको थियो ।