नेवाः छन्द कविता पूनर्जागरणय् १४ म्हसिया ब्वति
येँ, ५ फागुन २०७७ ।
महाकवि सिद्धिदास महाजु, कवि योगविरसिंह कसाः, कवि केशरी चित्तधर हृदयजुपिंस थःपिनिगु जीवन कालय् न्ह्याकावंगु नेवाः छन्द कविता अभियानयात हानं निरन्तरता बीकथं वंगु हप्ताय् नीस्वने ज्या जूगु नेवाः छन्द कविता पुनर्जागरण अभियानया द्यःल्हाना ज्याभ्mवः मूपाहाँ लाभरत्न तुलाधरजुया मुूपाहाँसूई म्हिगं श्रीपञ्चमीया पूण्य दिनसं झःझः धायेक क्वचाल ।
मूपाहाँ तुलाधरजुं विहांचुलि लसय् छपु थःगु छन्दवद्ध कविता म्ये न्ह्यब्वसें छन्दया महत्वबारे थःगु धारणा न्ह्यब्वयादीगु खः नापं वय्कलं थ्व पुनर्जागरण अभियान नेपालभाषा पद्य साहित्यया इतिहासय् छगू तःजिगु महत्वपूर्णगु ज्याझ्वः खः धयादिसे सफलताया निंतिं भिन्तुना नं देछाल ।
अथे हे पाहाँ जगत सुनदर ब्वनेकुथिया प्रिन्सिपल मय्जु सुनिता मानन्धरजुं थ्व पूनर्जागरण अभियान ब्वनेकुथिया संस्थापक व सञ्चालक दुजः लोककवि जकःमिया नेतृत्वय् न्ह्याःगुलिं ब्वनेकुथियात गौरव ताःगु दु धयादिल अभियानयात भिन्तुना बिल ।
अभियानया कजि व ज्याझ्वःया सभापति लोककवि राजभाइ जकःमिं अभियानया अवधारणा न्ह्यब्वयेगु भ्mवलय् सलंसः दँ न्ह्यःनिसें नेवाः पुर्खां संरक्षण याना वयाच्वंगु झीगु छन्द शास्त्रीय कविता न्हूगु पुस्तायात हस्तान्तरण यायेगु हे अभियानया मू आज्जु खः धाल ।
अभियानया मूपुचः दुजः ज्ञानेन्द्र बज्राचार्यजुं लसकुसं न्वचु व दुजः राधेश्याम महर्जनजुं ज्याझ्वःया उदेश्यवारे थःगु नुगः खँ न्ह्यब्वल ।
निगूगु चरणया ज्याझ्वःकथं ब्वनेकुथियां झिंपेम्ह ब्वमिपिन्त प्रशिक्षक राजभाइ जकःमीजुं नेवाः छन्द कविता स्यने, कने, ब्वने नां तयाः प्रशिक्षण ज्याझ्वः न्ह्याकादीगु खः । थ्व प्रशिक्षण स्वन्हुतक न्ह्याइ । ग्वसाःखलःया धापू कथं ब्वमिपिन्त छन्दया ज्ञान व नेवाः छन्द कविता ब्वनेगु (वाचन कला) स्यनेगु ज्या ज्वीगु नापनापं थ्व प्रशिक्षण स्वनिगःया मेमेगु ब्वनेकुथिइ नं न्ह्याका वनेगु ग्वसाः दयेका तःगु दु ।
