महायान बौद्धधर्म दर्शन कक्षाय् ताःलापिन्त दसिपौ इन

सुगत रत्न सिन्दुराकार
येँ, २ फागुन २०७७ ।

महायान बौद्ध समाजया ग्वसालय् निलायंक न्ह्याःगु महायान, बज्रयान बौद्ध धर्म दर्शनया प्रारम्भिक तहया कक्षाय् ब्वति कयाः ताःलापिन्त २०७७ साल फागुन १ गते शनिवाः दसिपौ लःल्हागु दु ।

महायान बौद्ध समाजया नायो एवं प्रशिक्षक बौद्ध विदुषि सुमति बज्राचार्यया सभापतित्वय् धर्मोदय सभाया नायो एवं बौद्ध विद्धान यज्ञमानपति बज्राचार्यजुया मूपाहांसुइ थुगु ज्याझ्वः न्ह्याःगु खः ।

उगु ज्याझ्वलय् प्रशिक्षार्थीपिन्त ज्याझ्वःया मूपाहां यज्ञममान बज्राचार्यजुं १६ म्ह शिक्षार्थीपिन्त दसिपौ लःल्हाना बिज्यागु खःसा न्हाप, ल्यू व लियांल्यू लाःपिन्त नगद प्रा.डा. नरेशमान बज्राचार्यजुं लःल्हाना बिज्यागु खः । उगु कक्षाय् न्हाप प्रभात किरण रञ्जित, ल्यू विजय श्रीरत्न बज्राचार्य व लियांल्य् सुगत रत्न सिन्दुराकारपिं लाःगु खः ।

उगु ज्याझ्वलय् थःगु नुगः खँ तयागु झ्वलय् ज्याझ्वःया मूपाहां बौद्ध विद्धान यज्ञमान पति बज्राचार्यजुं बौद्धतयगु जनगणनाया विषयवस्तुयात केन्द्र विन्दुइ तयाः थःगु खँ तया बिज्यागु खःसा वसपोलं मेगु दँय् जुइत्यंगु जनगणानाय् झी बौद्धतसें तच्वतं होस तयाः न्ह्याःवनेमाःगु खँय् बः बिया बिज्यागु दु । थुकथं हे उगु ज्याझ्वलय् पाहांया रुपं प्रा.डा. नरेशमान बज्राचार्यजुं थःगु नुगः खँ तया बिज्यागु ख । वसपोलं थःगु नुगःखँया झ्वलय् शिक्षा हासिल यायगु ज्या निरन्तर रुपं न्हयाका वनाच्वनेमाःगुलिइ बः बिया बिज्यासें थःम्हं सयकाःगु ज्ञानयात पटक पटक ब्वना वनाच्वनेमाःगुलिइ नं बः बिया बिज्यागु दु ।

उगु ज्याझ्वलय् सभातिया थासं बौद्ध विदुषि सुमति बज्राचार्यजुं थःगु नुगः खँ कनेगु झ्वलय् महायान,बज्रयान बौद्ध धर्म दर्शनया महत्वया विषययात कःघाना थःगु खँ कनाबिज्यागु खः । साहित्यकार विमल प्रभा बज्राचार्यजुं न्ह्याका बिज्यागु उगु ज्याझ्वलय् शिक्षार्थीया तर्फ सुगत रत्न सिन्दुराकारं थःगु नुगः खँ तयादीगु खःसा

ज्याझ्वलय् समाजया छ्याञ्जे रविन्द्र बज्राचार्यजुं लसकुुस न्वचु बिया बिज्यागु खः । ज्याझ्वःया मुपाहां यज्ञमानपति बज्राचार्यजुं बज्रसत्व देवयात देवाः च्याका ज्याझ्वःया उलेज्या याना बिज्यागु खःसा स्वस्ति वाचन राजेश बज्राचार्य, सुरेन्द्र बज्राचार्य व सागर बज्राचार्यपिन्सं मंकाः रुपं याना बिज्यागु खः ।

पाहांया रुपय् नेपाल परम्परागत बुद्ध धर्म संघया नायो प्रा.डा. नरेशमान बज्राचार्य, राज गुरुजु मञ्जु श्रीरत्न बज्राचार्य, बज्राचार्य संरक्षण गुथिया न्वकु सागर मान बज्राचार्य, गुथिया छ्याञ्जे मुनिन्द्र रत्न बज्राचार्य, बज्रयान महासंघया नायो राजेन्द्रमान बज्राचार्यजुपिं उपस्थित जुया बिज्यागु दु ।

Leave a Reply

Your email address will not be published. Required fields are marked *