चिनाखँ “थ्व खः जनताया सः”

च्वमि अमृतरत्न शाक्य
येँ ।

चिनाखँ “थ्व खः जनताया सः”

अय् नेता ।
चुनाव न्ह्यो
छिं भोट फ्वं वःगु इलय्
जिमिसं छितः
स्वाँ फ्वः देछानाः
लसकुस याना ।
छिगु चाकु माकुगु खँ न्यना
जि, जिगु परिवार
त्वाःया पासापिं जानाः
छितः त्याका नं छ्वया ।
छिगु विजय जुलुसय्
छितः स्वाँमाः क्वखाका
लसकुस नं याना ।
छिगु कार्यकालया बच्छि ई फुत
गो जिमिगु त्वालय्
छु विकास जुल ?
न धः दय्कल न लँ
न लँया गाःहे पर्कल
न मेलम्चीया आसय्
गनावंगु कथु प्याकेत
लःया पाइप हे वल ।
छिगु चाकु माकुगुु खँ ला
फुक्कं बकं फुस्लुगु लानाच्वन ।
कोविड १९ देशय् वयेवं
छितःला हाई सञ्चो हे जुल जुइ ।
थुकियात हे केना
थःगु असफलता
त्वपुइ दैगु जुल
तर छिं स्यु ला मस्यू
थ्व हे ल्वचं
जिमिगु त्वालय्
ग्वंम्ह मन्त
गुलि परिवार
बेसहारा जुल?
थ्व ल्वय् पाखें बचय् जुइकेत
छि थःगु पाखें छु याना दिया?
व बेसहारा परिवारयात
छु ग्वाहालि यानादिया?
ई बच्छि अझं ल्यं दनि
छिं बियागु बचं कथं ज्या यायेत
द्वंगु लँपु भिंका दिसं
ज्या याना केनादिसं
अय् नेता, छितः लसकुस यायेत
जिं हानंनं स्वाँमाः हने
थजागु विषम इलय्
ल्वा जक ल्वाना
गुलि ई सित्तिं छ्वयेगु ?
आ नं थःयात
मभिंकल धाःसा
थःम्हं ब्युगु बचं
पुमवंकल धाःसा
जि सुम्क च्वने मखु
भ्वाथःभिथःगु लाकां दक्वं मुना
जि छिमिगु लुखाय् दं वय्
छिमित लाकामं कय्केगु जक मखु
व हे लाकां माःहना
छिमित क्वखाय्केत
जि लिचिले मखु ।
म्हिगः स्वाँमाः क्वखाय्कागु थ्व ल्हातं
थौं लाकांमाः क्वखायेकेत
बाध्य यायेमते
आ ला सँन्ह्यलं चाय्कि
गात थःथः ल्वाय्
आ दे थकाय्त जाय् वा
आ देया दुश्मन तय्त
छधी छप्पँ जुयाः ख्याय् वा ।