श्वेतकालीको १२ वर्षे बनेपा जात्रा भव्य रूपमा सम्पन्न

November 9, 2025 admin

२३ कार्तिक २०८२, काठमाडौं ।

शरण डंगोल ।

कामपा १८ वडामा रहेको श्वेतकालीको १२ वर्षे जात्रा अन्तर्गत कार्तिक २०, २१ र २२ गते बनेपाको लायकु डबलीमा भव्य रूपमा सम्पन्न भएको छ ।

२० गते दिउँसो देव घरबाट निस्केका देवगण र गुथियारहरू बनेपामा पुगेका थिए । बनेपाको तला पुखु शिर गणेश मन्दिरमा गोप्य तान्त्रिक पूजा सम्पन्न भएपछि त्यहाँबाट देवगणहरू लायकु डबलीमा प्रवेश पछि त्यहाँ चाःच्वनेगु प्याखँ अर्थात् रात्रीको नाच झन्डै राती ३ बजे सम्पन्न भएपछि सो दिनको नाच सम्पन्न भएको थियो ।

यसै वर्षदेखि पहिले रोक लगाइएको पोसः बियेगु कार्यक्रमको फोटो र भिडियो खिच्न यही डबलीबाट अनुमति दिइएको थियो ।

भोलिपल्ट २१ गते बिहानै सुथमाजु (लोकेश्वर)को नृत्यसँगै सुरु भएको न्हि प्याखँ चण्डेश्वरीबाट चण्डासुर दैत्यको वध पछि पूजा र पोसः बियेगु कार्यक्रम पश्चात् दोस्रो दिनको बाह्र वर्षे जात्राको कार्यक्रम सम्पन्न भएको थियो ।

२२ गते बिहान देवगण र गुथियारहरू बाजागाजा सहित चण्डेश्वरी मन्दिर परिसरमा चतुर्थी पूजा अर्थात् चण्डेश्वरी र चण्डासुरको विशेष पूजा आजा पश्चात् देवगण र गुथियारहरूको काठमाडौंको देव घरमा फिर्ती सवारी पछि यस वर्षको बनेपाको १२ वर्षे जात्रा सम्पन्न भएको छ ।

जात्राको क्रममा स्थानीय जनता र स्थानीय सरकारको भरपुर सहयोग र उत्साहजनक सहभागिता रहेको थियो ।