सत्यनारायण बहादुर श्रेष्ठयात पत्रकार महासंघया संस्थापक अध्यक्ष घोषणा यायेत माग

१४, पाैष २०७८, काठमाडौं ।

सत्यनारायण बहादुर श्रेष्ठयात नेपाल पत्रकार महासंघया संस्थापक अध्यक्ष घोषणा यायेत माग याःगु दु ।

मदुम्ह श्रेष्ठया १०६ क्वःगु जन्मजयन्ती हनेगु नितिं नेवाः पत्रकार राष्ट्रिय दबूलिं गौशाला, सञ्चारग्रामय् च्वंगु नेपाल पत्रकार महासंघया सभाहलय् ग्वसाः ग्वःगु समारोहय् न्वंवासें थीथी खलःपुचःया प्रतिनिधिपिन्सं थुगु माग तःगु खः ।  थौंकन्हे नेपाल पत्रकार महासंघया संस्थापक नायःकथं कृष्णप्रसाद भट्टराईया नां कायेगु याः । भट्टराई नेपाली कांग्रेसया संस्थापक व नेपाःया न्हापांम्ह सभामुख नं खः ।

२००८ सालय् श्रेष्ठया अध्यक्षताय् नेपाल पत्रकार संघया स्थापना जूगु जुयाः श्रेष्ठयात पत्रकार महासंघया संस्थापक अध्यक्ष घोषणा यायेमाःगु नेवाः पत्रकार राष्ट्रिय दबूया माग खः । २००८ सालय् न्हापांगुखुसी नेपाल टुडेया सम्पादक श्रेष्ठया सभापतित्व, तरंगया सम्पादक भोजबहादुर सिंह न्यौपाने सचिव जुयादीगु नेपाल पत्रकार संघ गठन जूगु खः । २००८ सालया थुगु ऐतिहासिक तथ्यया ल्याखं म्हिगःया नेपाल पत्रकार संघ गुगु नेपाल पत्रकार महासंघय् हिल, उगु महासंघया न्हापांम्ह सभापति सत्यनारायण बहादुर श्रेष्ठ हे खः धैगु  तर्क जुयाच्वंगु दु ।

वय्कःया सभापतित्वय् गठन जूगु नेपाल पत्रकार संघया निक्वःगु सभा २००९ साल वैशाख २८ गते भोटाहिटीया आर्य समाजया सभाकक्षय् जूगु खः । उगु सभां नं सत्यनारायण बहादुर श्रेष्ठया हे सभापतित्वय् नेपाल पत्रकार संघ पुनर्गठन याःगु खः । थुकिया स्वदँ लिपा २०१२ साल चैत्र १६ गते पत्रकारपिनिगु बैठकं नेपाल पत्रकार संघया पुर्नगठन यासें नेपाल पुकारका तत्कालीन सम्पादक कृष्णप्रसाद उपाध्याय भट्टराई सभापति जुयादीगु खः । सत्यनारायणबहादुर श्रेष्ठं पत्रकार संघ स्वनादीगु प्यदँ लिपा तिनि नेपाल पत्रकार संघया अध्यक्ष जूम्ह कृष्णप्रसाद भट्टराईयात संस्थापक सभापति धायेगु यानाः वयाच्वंगु दु ।

समारोहय् न्वंवासें वक्तापिन्सं २०१२ चैत्र १६ गते स्वर्गीय कृष्णप्रसाद भट्टराईया नेतृत्वय् स्थापित नेपाल पत्रकार महासंघ उगु हे पत्रकार संघया पुनःगठनं दयेकूगु न्ह्यथंसें स्वर्गीय श्रेष्ठयात नेपाल पत्रकार महासंघया संस्थापक अध्यक्षकथं सम्मान बीमाःगु माग याःगु खः ।

उगु समारोहय् नेपाल प्रेस काउन्सिलका अध्यक्ष बालकृष्ण बस्नेतं पत्रकार महासंघया संस्थापक बहसबारे महासंघया सम्बद्ध पक्ष पन्छे जुइमज्यूगु न्ह्यथनादिल । ‘नेपाःया सञ्चारवृतय् थ्वयाच्वंगु महासंघया संस्थापक अध्यक्ष बारेया बहसय् सम्बद्ध पक्षं जवाफ बीत आलटाल यायेगु मखु । थुकिया बारे गम्भीर वहस व छलफल यायेमा” अध्यक्ष बस्नेतं धयादिल ।

समारोहय् नेपाल आदिवासी जनजाति पत्रकार महासंघया वरिष्ठ उपाध्यक्ष गजुरधन राईं संस्थापक अध्यक्षया बहसया उद्देश्य २०१२ सालय् महासंघया नेतृत्व यानादीम्ह स्वर्गीय भट्टराईयात अनादर बाय् अवमूल्यन यायेगु मखःसे इतिहास हिलेगु कुतःयात पनेगु, व सत्य स्थापित यायेत खः” धयादिल । नेपाल पत्रकार महासंघं थः संस्थापक अध्यक्षया खँय् पुनःविचार मयाःसें मगाः” वरिष्ठ उपाध्यक्ष राईं धयादिल ।

उगु ज्याझ्वलय् पत्रकार राष्ट्रिय दबूया सल्लाहकार वरिष्ठ पत्रकार सुरेशकिरण मानन्धरं सत्य व तथ्यया नितिं सः तइपिं पत्रकारतय्सं ऐतिहासिक तथ्यया सम्मान यायेमाःगु खँ न्ह्यथनादिल ।

मधेसी पत्रकार समाजया अध्यक्ष मोहन सिँहं सत्यतथ्य सकसिनं स्यूसां सुनां च्यूताः मतःगु, सम्बोधन मयाःगु धयादिसेें ‘महासंघया आः धयातःम्ह संस्थापक अध्यक्ष देशया प्रभावशाली व्यक्तित्व जूगु हुनिं नं स्वर्गीय श्रेष्ठया योगदानया इतिहास बिस्मृतिइ लाःगु खः ।’

स्वर्गीय श्रेष्ठया म्ह्याय् सुजिता मानन्धरं थुगु खँय् थप अध्ययन व प्रमाण मुंकाः सकारात्मक रुपं न्ह्यांवनेमाःगु न्ह्यथनादिल ।

ज्याझ्वलय् न्वंवासें नेवाः पत्रकार राष्ट्रिय दबूया अध्यक्ष सुरजवीर बज्राचार्यं “इतिहासया थुगु तथ्ययात हुइगु, न्हंकेगु कुतः जुयाच्वंगु जुयाः पत्रकार महासंघया संस्थापक अध्यक्षया मुद्दा न्यायया नितिं संघर्ष खः” धयादिल । वयकलं थुगु संचारग्रामय् हे संस्थापक अध्यक्षया मान बियाः सत्यनारायण बहादुर श्रेष्ठया प्रतिमा नीस्वनेमाःगु कनादिसें जन्मजयन्ती समारोह हनाज्याया भाला नं पत्रकार महासंघं थःगु जिम्मेवारी नालाः कायेमाःगु न्ह्यथनादिल ।

ज्याझ्वलय् पत्रकार राष्ट्रिय दबूका निर्वतमान अध्यक्ष श्रीकृष्ण महर्जनं इतिहासया अपव्याख्या यायेमज्यूगु धयादिसें “२००७ सालय् देशय् प्रजातन्त्र वल । २००८ सालय् हे श्रेष्ठं पत्रकारपिनिगु संगठन दयेकादिल । थ्व वयकःया दुरदर्शीताया प्रमाण खः । इतिहासया थुगु कालखण्डया अपव्याख्या जुइमज्यू” धयादिल ।

वयकःया किपातय् विषेश अतिथि, अतिथिनापं उपस्थिति सकलसिनं स्वां देछाःसें समारोह उलेज्या जूगु खःसा ज्याझ्वलय् मूपाहांया रुपय् सुं व्यक्ति विशेषयात मखःसे वयकः श्रेष्ठयात हे प्रतिकात्मक रुपं ज्याझ्वःया मू ब्यक्तित्वकथं सम्बोधन याःगु खः ।

नेपाःया सञ्चारवृतय् गृष्मबहादुर देवकोटाया नेपाली छापाखानाको इतिहास नांगु सफू व मेमेगु थीथी दस्तावेजया आधारय् महासंघया संस्थापक अध्यक्षबारे बहस जुयाः वयाच्वंगु छगू दशक थुखेनिसें पत्रकार राष्ट्रिय दबूलिं ‘न्यायया नितिं संघर्ष’ कथं कयाः थुगु अभियानयात मद्दिक्क न्ह्याकाः वयाच्वंगु जुलसा वंगु ३ दँ न्ह्यःनिसें पुस १३ गते वयकःया जन्मजयन्ती समारोह न्यायेकेगु यानाः वयाच्वंगु खः ।