चिबाखं “जिद्दी”

च्वमी मचाकाजी महर्जन

 

चिबाखं “जिद्दी”

 

“थन छकः स्वयादिसँ ले ।”

“छाय् छु जुल ? अफिस वने लिबाय् धुंकल ।”

“जिमि पासा दिपाया इहिपाःया ब्वना पौ वःगु । पार्टि भ्वय् वनेत बाँलागु पर्सि छत्वाः न्यानाबिया दिसँ न्हिं ।”

“मखु, छंन्त वंगु महिनाय् तिनि न्याना बियागु मखुला धया ? आः हानं छाय् माल मेगु पर्सि ? वहे सिना वंसा मज्युला ?”

“अन पासापिं ……… ।”

“का म्वाःल हाला च्वने मते जितः अफिस वने लिबाय् धुंकल । हन्चा खँ ल्हाय् का । ”

“जिं धयागु ताः हला ?”

………………………..

“पासापिं दक्वस्यां गज्यागु न्हून्हुगु डिजाइनया गज्याःगु बाँबाँलाःगु पर्सिं सिना वईगु जुई । थः जक वहे पुलांगु पर्सि सिना वनेबले मेपिंस छु धाईगु जुइ ? हानं पार्टि नं आःतिनि चायेकुगु न्हूगु पार्टि प्यालेसय् हँ ।”

“स्व मिसा ! मेपिंसं किसि गल धायेवं थःम्हेस्यां थामिचा गये मज्यू । धाइगु नापं दु – जाब्व स्वया बौ बिइमाः ।”

“स्वया दिसँ न्हि ! जिं मेगु खँ छुं मस्यू । न्ह्यात्थे यानासां न्हूगु पर्सि छत्वाः न्याना बिइ हे माः । मखुसा …… ।”

“मखु छं गथे खँ मथूगु धया ? मस्तय्त आखः ब्वंके हे माल । छं सि हे स्यू, जिगु आम्दानी गुलि दु धकाः । बरु मेगु पालय् न्याना बिइका । आः छकःयात व हे सिना हुँ ले ।”

“मखु, कलायात धाःबले पर्सि छत्वाः हे न्याना बिइ मफुम्हेस्यां ब्याहा हे छाय् याये माःगु ? मचाखाचा छाय् दयेके माःगु ? ब्याहा हे मयाःगु जूसा न कला लहिगु झन्झत, न मस्तय्त आखः ब्वंकेगु झन्झत ?”

“हत्तेरिका ! जिन्दगी नं गज्यागु गज्यागु ? ‘छेँ कःनि क्वाराक्वारा, पिने लाकां तारातारा’ धाःगु थ्वहे जुइका ।”