ज्ञानी राजाया प्यपु मुक्तक (२)

ज्ञानी राजा मानन्धर
साहित्यकार
यें, नेपाः

(१)
लुइके मफत हलिमय् सुं न थः धाइपिं
करकीगु दुःख न थःगु नालाः कः घाइपिं
दुःख फुक्क थःगु हे नुगलय् घाना जुयेमाः
न्ह्याम्ह नापलाःसां भचा मगाः हः धाइपिं !

(२)
झीगु देसय् ल्वःवनापुसे च्वंगु प्रकृति आपालं दु
नापनापं न्ह्याइपुसे च्वंगु संस्कृति आपालं दु
अहिंसावादी जन्म जूगु भूमी हिंसक त म्वः म्वः
बिदम्बना झीथाय् कृति स्वया बिकृति आपालं दु ।

(३)
क्रिकेत कासा ख्यःया जुजु नांजाःम्ह ब्रायनलारा सकस्यां स्यू
राजनिति कासा ख्यःया जुजु नांजाःम्ह सर्बहारा सकस्यां स्यू
छम्ह बाय्त ज्वना ब्वायं जुइम्ह छम्ह क्रांतिया चिलाख च्याकाः
छम्ह थौं तक जनप्यारा सा छम्ह जुल थौं जनमारा सकस्यां स्यू ।

(४)
मतिना जालय् क्यंकेत स्वल
मिखां मिखा ल्वाकेत स्वल
होस् हे मदय्क मोहनी यानाः
बेहोस् याना ब्वाकेत स्वल !