जिगु झिपु नेवा: हाइकु

ज्ञानी राजा मानन्धर
साहित्यकार
यें, नेपाः

 

१.

मिखा त्यानु चा:

गुब्ले जक च्याइगु

भाग्यया इता:

 

२.

सिमा जुइमा

इंचा मुग: व सुर्य

छगू हे बिर्य

 

३.

जि य:म्ह शत्रु

नापलात ध्वदुक्क

न्हिल मुसुक्क

 

४.

म्हसिके थाकु

बुलुया वल मिखा

सु थ: सु कत:

 

५.

नेवा: झी नेवा:

समय् बजि नये वा

पालू भचा ति

 

६.

अर्बौं अत्तर

बागमतिं नतुन

नव:गु मतं

 

७.

थौंया सभ्यता

बुँइ धेबा पिइगु

छेंया क:सी वा !

 

८.

थ:गु नुग: घा:

क्यनेमते सुयातं

छ्वाकी मल्ता चिं

 

९.

चिलाख च्यात

नेवा:त दनावल

हि क्वानावल

 

१०.

थौं बधाइ बी

कन्हे सरा: बीमाली

झी नेवा: मन्त्री