चिनाखँ “मिंप्वाः दुने”

च्वमी कबिन्द्र लाल प्रधान

चिनाखँ “मिंप्वाः दुने”

छुं ई
ल्याय्म्हसूया ल्यूल्यू
छुं लुमं थें
छुकें म्हय् थ्यू थें
घय् पू वः थें
दुने दुने
छु कें छुकें पू थें ।
आ ला
घौ पलख जक तापासां
नुगःपाः
सासः
मिखा
अंग प्रत्यंग त बुलुमिं लुमनिगु ।
थःगु हे चित्ताया च्याःगु मिं
छुं कथं स्याय् फइ जुइ
छंगू जिगु देशय् च्याःगु मिं
छुंकथं स्याय् फैगु जुइ
गजागु मतिना जुल ।
गनं नं खंसां
गन नं मखंसां
सःताय् दतसां
सःमतय् वं हे
मिं पूगु नुगः थें
मिं च्याःगु छाति थें
च्वापुइ वना झन् च्याना वल
लखय् दुविना झन् च्याना वल
सिचु थाय् वना म्हं झन पू थें जुल
लोंहितिया लँ त्वना झन् नुगः हे पू थें जुल
बाःगय् फय् कया फसं झन् दुने थ्यंक मिं थिल ।
ए मतिना !
जिगु इनाप दु
सिमा हः
सुथःया नःलि या ई
न्हिथः या लुमुगु निभाः जः
सनिलःया मोहक जः
नगुः त
तिमिला
साक्षि दु
जिके दुने च्याःगु मिं
जिगु अंग प्रत्यंगय् थिया च्वःगु मिं
छं हे स्याय् फु ।
छंगु जिगु दथुई स्वाःगु स्वापुइ
छन्त छं हे लः बिया ह्वेय्का तःगु स्वां देछाय्
झीगु दथुइ न्ह्याना च्वंगु खुसीया लः देछाय्
जिगु इनाप
जिगु सम्पूर्ण न्हि छन्त बीफु
च्याना च्वंगु मिं स्याना
जित जिगु सुनसान चा ब्यु
जिं जिगु चा त्वते मफुत
बरू खरानि क्वसः काय् ।
छु मति दु खः
वहे धया व्यु
च्याना खरानि जूसां फया काय्
च्याना खरानि जूसां मन त्याका त्वते ।
छु मति दु खः
वहे धया व्यु
स्वां ह्वल धाःसा
माः हना
छमाः जुया ह्वने ।