बाखँ “शंका´´
च्वमी मचाकाजी महर्जन
बाखँ “शंका´´
`मखु धया गुलिजक धायेगु छित: । न्ह्याक्व धा:सां ज्युगु मखु । धाधां धाधां जिला कायल जुइ धुंकल ।´
`मखु मिसा, छु धया च्वनागु छं ? जिंला छुं हे मथुल । पुवंक धाले छु धाये त्यनागु छ ?´
`स्यूसां मस्यु पह: याना च्वने मते न्हिं । जित तं पिहां वलकी … ।´
`हत्तेरिका ! धायेगुसा याकनं धा । मखुसा…´
`छु मखुसा … ! अझ वयाहे स: तस:निका ।´
`अले छुलेसा ? छित: मेमेपिं मिस्तनाप जुइ मते धका: गुलिजक धायेगु । पिनेवंसा छं भा:तं मिस्त हिला हिला जुल धका: धा:गु जक खँ न्यना: जिगु न्हाय्पं हे हिइसे च्वने धुंकल । छि चाहिँ अझ छुं मखु थें … । छुं जुया वहे मिसा थन छेँ दुहाँ वल वा छिं दुत हल धा:सा थ्व छेँया गति छु जुइ ? अले झी मचाखायाया गति छु जुइ ? गबलें विचा: यानागु दुला छिं ?´
`हत्तेरिका थ्व मिसातय्गु बुद्धि ! गुलिजक शंका यानाच्वंगु खनिका । छं मथुका थज्या:गु खँ । छं छुं हे शंका यायेम्वा: थ्व खँय् ।´
`अं, छिं धायेवं सुंक च्वनेका जि । साया घा: क्वखं मस्यू धा:थें छिपिं मिजंतेस मिसापिनिगु मनया घा: छु सिइ ?´
`खँ छु धा:सा नि ! खँ छु धा:सा नि … ´
`छु खँ छु धा:सा नि, खँ छु धा:सा नि …?´
`झी निम्हेस्या दथुइ गबलें ल्वापु, मनमुटाव जुगु दुला थौंतक ? गबलें झी तसकं तकला हाले म्वा:नि । ख: कि मखु ?´
`वला ख: । तर थ्व खँलिसे थन छु सम्बन्ध दु ले ?´
`छं नं टि.भि., रेडियोलय् महिला हिंसाया बारे बुखँ न्यना हे च्वंगु दु । नापं छाय् थथे जुल जुई धका: मनय् नं वंगु दै, मदुला ?´
`दु … । तर छिं जित: अलमल याना खँ चाहिकेत स्वयेमते न्हिं । जित: तं पिहाँ वलकी … !´
`ह … ! थौंकन्हे जि थज्या:गु हे महिला हिंसा छाय् जुल ? थुकिया कारण छु अले थुकिया लिच्व: गज्यागु लाई धका: अध्ययन याना च्वनागु का । ज्युसा थ्व हे विषयलय् पिएचडी याये धका: । थुलला छं ? अथें हे म्वा:मदुगु शंका याना च्वनी । झन्डै थ्व हे खँयाना गबलें ल्वापु मजुगु छेँ ल्वापु जुइत्यंगुका थौं ।´
`न्हाच: हे धायेम्वा:लाले थथे ख: धका: । छिं अध्ययनया च्व:गु ब्वना: थुइका: सुयागुं छेँ थज्या:गु ल्वापु मजुल धा:सा गुलि बांलाई हला ? का जिं क्वाक्क च्या त्वंके हय् ।´