थ्वहे सनिवा खुल्लामञ्चय् नेपाल आर्केष्ट्रा जुइगु

२६ जेठ २०८०, येँ, नेपाः ।

नेपाः बहुभाषिक, बहुजातिय, बहु सांस्कृतिक देय् जक मखु बहुल सांगीतिक देय् नं खः । नेपाः दुनेया थीथी जाति व भाषाभाषीपिनि थःगु हे कथंया लोक संगीत व लोकबाजंत दु । थ्व थीथी जाति दुने नेपाःया संस्कृतियात जीवन्त याना तयेगु निंतिं नेपाः देय्या आदिवासी नेवाःतय्सं निरन्तर तिबः बियावयाच्वंगु दु । नेवाः जातिया छगू तःधंगु समुदाय ज्यापुतय्गु मंकाः राष्ट्रिय संगठन ज्यापु महागुथि नेपाःया पलिस्था २०५० साल भाद्र २६ गते जूगु खः । थुगु महागुथिं येँ महानगरपालिकालिसे सहकार्य यानाः तःदँ न्ह्यःनिसें ज्याझ्वः न्ह्याका वयाच्वनागु जुल । थ्व हे झ्वलय्ु येँ महानगरपालिकाया सम्पदा तथा पर्यटन समिति व ज्यापु महागुथि नेपाः केन्द्रीय समितिया मंकाः ग्वसालय् ज्यापुलिसें नेवाः व नेपाःया थीथी जातजाति व भाषाभाषीपिनिगु प्रतिनिधिमुलक थीथी लोकबाजंत मंकाः कथं ब्वयेगु तातुनाः अन्तर्राष्ट्रिय संगीत दिवसया लसताय् “नेपाल आर्केष्ट्रा ११४३” ज्याझ्वः थ्व हे ने.सं. ११४३ तछलाथ्व सप्तमि (२०८० जेठ २७ गते) येँया खुल्लामञ्चय् ग्वसाः ग्वःगु दु ।
युवा पुस्तायात थःगु मौलिक परम्परागत बाजागाजा व संगीत ख्यलय् मन क्वसाय्काः पुस्तान्तरण यायेगु व थ्व ख्यःयात अझ विकास व विस्तार यायेगु व नेपाःया थीथी समुदायया बाद्यवादन बाजागाजा व संगीत देय् दुने व देसं पिने नं प्रचार प्रसार यानाः आन्तरिक व बाह्य पर्यटन प्रवद्र्धन यायेगु नेपाल आर्केष्ट्राया मू आज्जु खः ।
थुगु आर्केष्ट्राय् थ्यंमथ्यं ४० ताजिया बाजागाजा दुथ्याःइ व ३०० म्ह मल्याक कलाकारपिसं थःथःपिनि प्रतिभा न्ह्यब्वया दी ।
नेपाःया लोकसंगीत ख्यलय् थीथी जाति व भाषाभाषीया ३०० नं मल्याक कलाकारपिसं मंकाःकथं छक्वलं थःगु प्रतिभा न्ह्यब्वइगु थ्व ऐतिहासिक ज्याझ्वः खः । नेपाःया संगीत ख्यलय् थुलिमछि कलाकारपिसं छक्वलं थःगु प्रतिभा न्ह्यब्वइगु थ्व हे न्हापांखुसी खः धइगु आयोजकया दावी दु ।
ज्याझ्वः ज्यापु महागुथि नेपाः व येँ महानगरपालिका सम्पदा तथा पर्यटन समितिया मंकाः ग्वसालय् जुइत्यंगु खः ।