गजल – मताः न्हाय्पं ख्वाँय् तयेसं न्ह्याक्व ध्वाति पूसां

च्वमि कृष्ण दास जाेशी

गजल

मताः न्हाय्पं ख्वाँय् तयेसं न्ह्याक्व ध्वाति पूसां
मधाः मिखाकां तयेसं न्ह्याक्व ख्वबि हूसां ।

गरिबया प्वाथय् किमिसितं छु पात धकाः
व सम्भ्रान्त मनू तय्तः, इमिनं प्वाःदु धकाः थूसां ।

सेवा धर्म मखु छ्यनय् न्हुयाः थांवःपिं इमिसं
थकाइ गन थन न्ह्याम्हं थां वयेमाः धकाः स्यूसां ।

खः निभाःलू, लुयां छुयाये, ह्वगं वसःतय्
क्वाःजः मवः ख्वाउँफसय् सुद्र्यः न्हिंन्हिं लूसां ।

द्यः वातां द्यगलय् च्वनाः, छाय न्वःमवाः छुं हे
मनुखं हलिमय् त्यःमत्यः न्ह्यागु हे यानाः जूसां ।