गजल

च्वमी – कृष्ण दास जोशी

गजल

चिकुल छख्वला अय्लाः नापं छम्हँ क्वानावल
नुगः दुने च्याःगु मतिना मिब्वाला गुनुहुं ग्वानावल ।

छंगु मुसु मुसु काःगु वो ख्वाः स्वयाः खंका जिं
ह्याउँ ह्याउँ धाःगु वो न्यताः बुलुहुं च्याना वल ।

थुल जिं थ्व इलं ह्वाःगु लकस रसरंगया खः
उकिं हे जुइ मचाय्क म्हँ म्हँ झीगु ल्वानावल ।

मथू मस्यू मखु थ्व हर प्राणीया स्वापू खः
मनया इच्छा दयाः मखा निम्हं छथाय् स्वानावल ।

जोभनया पुखुली म्हिताः म्वःल्हुइ न्ह्याइपु गुलि
कासा म्हितुम्हितुं छनं जिनं निम्हं त्यानावल ।