तरकारि म्हिचा
मानन्धर रमेश “अणु”
साहित्यकार
यें, नेपाः
तरकारि म्हिचा
तरकारी न्यानाः तयेत ज्वनाः वःगु म्हिचा थाथामाथा याइ । प्वंगु म्हिचां छुं कुतुं मवः । थःम्हं फिनातःगु तःपाःलं अले ज्वारिकोटय् दूगु दक्वं म्हिचाय् ल्हाः दुछ्वयाः स्वत । गनं नं छुं मलू ।
खला न्हाचः नं निकः तक थःगु खल्तिइ माले धुंकुगु खः बुरां । तर छुं नं लुया मवः । बुराया ख्वाः निभालय् पानातःगु वाउँचा थें सुखु चिनाः वन । न्हकुं भुइचःति हाल ।
थः गनं गनं वयागु खः अन अन लिहा वँ वं मिखा बँय् तयाः मालाच्वन । ख्वालय् ग्याःचिकु दु । तरकारि न्याना हजि धकाः थः भलिं (भौनं) न्यय्तका दां बियाः धाःगु वयागु न्हाय्पनय् भौया सः गसू दुहां वं थें वनाच्वन “का थ्व न्यय्तका दामं गुलि अप्वः तरकारि न्याना हयेफु हयेगु का । सच्छि वंगु ब्यूसां चत् न्यासः वंगु ब्यूसां चत् । न्हिंन्हिं पिहां वनीम्ह ख हे खः थें । अप्वः हयां छु याये ? थन फ्रिजय् तयेथाय् नं मदये धुंकल । तरकारि न्यायेगु ला त्वहः जक ला खः नि । दां ल्हातय् लाके माःगु दु का । कमे याइम्ह छम्ह नइपिं झिम्ह झिम्ह । ‘नीतका धाःसा झितकां ब्यु ले’ धकाः झितकां कयाः हये सयेकेगु का” धकाः तरकारि न्यायेगु नं स्यना हःगु ।
व हे न्यय्तका दां नं हुलमुलय् गन कुतुंवं गन । मामां लुइके मफया च्वन । त्यानुयाः छगः देगःया फलय् च्वनाः आः छु यायेगु धकाः नुगलय् खँ वात्तु वायेका च्वन । ‘तरकारि मयंकेगु खःसा छेँय् दुहां मवंसां ज्यू । जा जक नये मखंसा म्वाय्से धायेका म्वाः म्वाकं छुँचित क्वःतय्सं चिचि त्याये थें चिचि त्याकाः च्वने माली तिनि आः ।’ तरकारी मन्यासें छेँय् लिहां वनेगु हिम्मत मन्त बुरायाके ।
देगःया क्वसं मस्त, बुराबुरित फ्यतुनाः थःगु न्ह्यःने रुमालचा छकू लानाः फ्वना च्वंपिन्त स्वयाः च्वन । उबलय् लाक्क छम्ह बाज्यःति वंम्ह मिसां फ्वगिंतय्गु ल्हातय् झितका वंगु छपाः छपाः नोट ब्युब्युं वन । बुरा अजू चायाच्वन । वं फ्वगिंतय्सं लानातःगु रुमालय् छक्वः मिखा ब्वल । अन चानचुन ध्यबा जक मखु छतका वंगु, न्यातका वंगु, झितका वंगु अले न्य्तका वंगु व सच्छि वंगु दां नं खन ।
मचायेक बुरां थःगु ल्हाः थःगु खल्ति दुने यंकल । म्हिचां रुमाल छकू लिकानाः देगःया फलं कुहां वयाः बँय् रुमाल लात । मछाःगु ख्वाः त्वःपुइत तरकारि न्यानाः यंकेत ज्वनावःगु म्हिचा थःगु छ्यनय् तयाः थुचुक्क फ्यतुल ।
