हिरा मोति
ज्ञानी राजा मानन्धर
साहित्यकार
यें, नेपाः
हिरा मोति
इहिपा जूगु न्यान्हु लिपा चान्हय् न्ह्य:पा: जुया सुथय् भचा न्ह्य: वया च्वंगु सुनिताया । सुनां खापा संकूगु थें ताल । वाथाइथा दना: खापा खन ! सुनिताया पिंलि लुखाय् दना: चुलिंचू ख्वा: मस्वसें छखे फस्वया: ” सुथ:या खुता इ: जुइ धुंकल , दने मत्य:निला ? गुलि जक न्ह्य: व:गु । का याकन दना चुकय् तुन्थी ल: का हुँं । झीथाय् हिती ल: मव:गु झिन्हु दय् धुंकल !” धया: घ: निग: बस्स्वाना फनक्क फहिला थाहां वन ।
सुनिताया मन भाराभारा मिन ! नाडी च्वंगु इलचं पाखे मिखा ब्वल ! धात्थें खुता इ: पुले धुंकूगु खनि ! न्हाय्कं स्वया: भुलुसुलूं दना च्वंगु सँ भिंकल ! खाताय् सुमन फुंग घय्पुना फुं फुं स: वय्क द्यना हे च्वन तिनि !
सुनिताया माजु ला द्यो थें , छुं हे स्यूम्ह मखु ! वया पिंलिम्ह वो छेंया माजु नकीं थें धैगु प्यन्हु न्यान्हुं हे थुइकल सुनितां ! म्हुतु छुच्चा ! निम्हेस्या दथुइ न्ह्याब्लें कचवं वया हे च्वं ! तर सुनिता छम्ह संस्कारीम्ह , सिक्षितम्ह मिसा जूगुलिं न्ह्याथे जूसां न्हिला: न्हिला: सह: यायेगु बानि !
इहिपाया दत्त्या लिपा हे मां जुल सुनिता ! छम्ह म्ह्याय् यात जन्म बिल ! छें लक्ष्मी दुहां व:गुलिं छेंज:पिं सकलें लय्ता: !
निम्ह त्यपुं ज्या दुपिं ! निम्ह ज्याकू वनेमा:गुलिं सुनिता सुथय् छेंया ज्या सिधयेका हथासं मचायात बुया: थ:छें थ्यंक त: वनि ! भातभाता न्यासि हे वनी, भचा हे कू मचासे ! अन लिपा ज्याकू थ्यंकी ! ज्याकुथिं लिहां वया: थ:छें जुया: मचा ज्वना बह:नि लिबाक्क तिनि छें थ्यनि ! थुकीं याना पिंलिम्ह नाप कचमच जुया: छखे च्वने मा:गु स्थिति ब्वलन ! छखे च्वन सुनिता !
सुनिताया ख्वा: खुंसे च्वं थौं ! ज्याकुथी च्वने हे मं मन्त ! थ:छें मचा का: वन ! मां नाप न्ह्यागु खं न ब्या: सुनिताया ! मांयात थ:त जुया च्वंगु खं न्ह्यथन ” मां जिगु मज्यु जूगु दित ! च्यान्हु दय् धुंकल ! छु याये , छु याये ! ”
मांम्ह ” मखुथे जुल का ! झीगु म्हय् हि मगात कि न थथे जुइ य: गुब्लें गुब्लें ! डाक्टर क्यना स्व छक: ! हथाय् चायेम्वा: ! “
मांया खँ न्यना: सुनिताया सास: थाहां वल !
कन्हे कुन्हु हे डाक्टर क्यं वन सुमन नाप ! डाक्टरया लिस: न्यना सुनिता याग्ला प्याग्ला वन ! पोजेतिभ हे क्यन !
चच्छि फाताफाता पुला: चा वन ! सुथय् थ:छेंय् मचा त:वंम्ह सुनिता मांयात ” पोजेतिभ हे क्यन मां ! जिपीं निम्हेस्यां मचा क्वकायेगु हे बिचा: याना !” धायेवं हे मांम्ह ” आग छियाये ! छु धैगु छं ? अथे यायेमजिउ मैयां ! भ्रुन हत्या थें त:धंगु पाप छुं हे मदु थ्व हलिमय् ! जू जू थे जुइ का , भगवानं छु याइ बांला:गु हे याइ ! उकिं छं थथे यायेगु मनय् तय्मते पुता !” मांम्ह इमित गन !
मांया खँ न्यना: सुनिताया मिखां ख्वबि स्व: स्व: हाल ! छेंय् सुमन नाप सल्ला याना मां न धाथे हे यायेगु क्व:छि !
लिपा न म्ह्याय् हे बुल सुनिताया ! ज्या मत्व:तू सुनितां !
निम्ह मस्तय्त निम्ह त्यपूं छ्योलंमुलं चुया: ब्वलंकल ! निम्ह त्यपूं स्वेच्छिक अवकास जीवन हना च्वंगु दु ! तर सुम्क मच्वंसे थ:गु हे छेंय् छगू कन्सल्तान्सी चायेका: ज्या याना च्वंगु दु !
थौं त:धीम्ह म्ह्याय् डाक्टर ! चीधीम्ह म्ह्याय् आइ. ति. अफिसर ! वो हे चीधीम्ह म्ह्याय् गुम्हेसित थ्व संसारय् पला: तय् न्ह्य: हे स्याना छ्वय्गु मति त:गु ख:, व हे म्ह्याचं सुनिता व सुमन निम्हं मां अबुयात यूरोप अमेरिका जक मखु संसार चा:हिका हय् धुंकूगु दु ! काय् मदय्क मगा: धाइगु क्वपूं समाजया न्ह्य्:ने दसू जुया: दना ब्यूगु दु सुनिता व सुमनया निम्हं म्ह्याय् ! निम्हं मिसा मस्त मां अबुया निंति छम्ह हिरा सा छम्ह मोति !