चिनाखँ “संवेदनशिलता”
च्वमि कबिन्द्र लाल प्रधान
यल ।
चिनाखँ “संवेदनशिलता”
थर्ड जेन्दर जक असम्बेदनशिल
गथे जुइ फइ
गथे जुइमखु धाय् फइ ।
उतिकं अस्तित्व दु
उतिन्यंक चकना दु
बिस्कँ चेतना दु ।
फय् थें छाय् फु
गुबलें याउँक यइपुसे नाइसे च्वनेफु
मिखायात दोष मदु
नुगःयात रोष मदु ।
जि कचा
छिमिसं नं स्यू हे जुइमा जिगु संवेदनशिलता
व अमाःसि,
पिनें पिनें छाःम्हं जूसां दुनें नायुम्हं
गुलि क्यातुम्ह खः वया हःयाके न्यँ
छ लालुपात्या थें सुन्दरता ह्वलाजुइम्हं
गथे छ संवेदनशिल खः ।
झ्वाप्प च्वंक यौवनं ह्वेगु छंगु इच्छा खःसा
चकंक ह्वेगु छंगु इच्छा खःसा
संवेदन आवेगं ज्वारभाटा तच्वैगु वयागु बाध्यता खः
सुला सुला ब्वय्गु व सुला सुला स्वय्गु छगू मेगु प्रक्रिया खः ।
संवेदनशिलता
छंगु नायुपनां वयात छाःगु फसं कय् फु
छंगु सुन्दरपनां व नाया वने फु
छंगु संवेदनशिलतां वयागु संवेदनशिलता क्वःदले फु ।
आखिर
वयाके नं संवेदनशिल जुइगु अंग त दु
फरक थुलि हे जक
व भंग जुल कि छ नं भंग जुइ ।
मनूया संवेदनशिलता
कँया दथुइ ह्वया च्वंगु व गुलाफ खः
ह्याउँक वाउँक थी थी
संवेदना छगू तिसा खः ।