चिबाखं “पाकः दाइ”

च्वमि कृष्ण दास जोशी
नेपाः

चिबाखं “पाकः दाइ”

फेसबुकय् छपाः किपाः पोस्ट यानांतःगु खन । झसंग वन हर्षं मान । कोथिक स्वल, खः थः हे दाजु । किपाःया लू थःगु हे त्वालय् च्वंगु छगू फल्चा । भ्वाथःगु लासाय् ह्वगंगु सिलः छपुं भुनाः च्वंम्ह पाकः दाइ । केवल ख्वाः जक खने दु । फेसबूकया स्ट्याटसय् च्वयाःतःगु दु, किजापाखेँ उपेक्षित जूम्ह पाकः दाइ उद्धारया प्रतिक्षाय् । किपाः नं न्वःवानां च्वन, जिमि किजां अन्याय यात, जि वर्वाद जुल ।

हर्षं मानया छसीकथं पुलां खँ लुमनाःवल । खः दाजुम्ह पाकः । तर इमान्दार । छें माक्व ग्वाहालि यानाःच्वंम्ह । वया ज्या मदु । कमाइ मदु । छें हर्षं मानया मस्त इस्कुलय् तः वनेगु काः वनेगु, छें सुचुकुचु यायेगु आदि छेंया न्ह्यागुं ज्या याइम्ह । किजाया लागिं म्हां धकाः धाइम्ह मखु, सकतां यानाःबीम्ह । हर्ष मानंनं दाजु यातः नयेगु त्वनेगु वसः माक्व बियाच्वंगु खः । छुयाये अय्नं तवि हर्षं मानया जहान निलां पाकः दाइतः सहः हे मयाः । ब्यवहार याइगु च्यःतः सिवें क्वह्यं । थ्व खँ हर्षं मानं स्यूसां तबि निलाया न्ह्यने न्वःवाय् मफु ।

संजोगं प्यदँ न्ह्यः हर्षं मान यातः अमेरिकाया डिभी लात । मस्तयेगु भविष्य अलय् थःपिनि समृद्धि या भविष्य ज्वनाः इपिं अमेरिका ब्वल । अमेरिकाय् वयाः स्वदँ लिपा वयागु छेँ लँ तब्या याये नितिं सरकारं थुन धाःगु वं सिल । उब्लय् हे व नेपाः वयेमास्ते वःगु खः । वया पाकः दाइया बन्दोवस्ती या नितिं । तर थःगु ज्या, मस्त व परिवार तुरंत त्वताः वयेमफुत वं । खः थः अमेरिकाय् सां छेँ बालं च्वंपिं दूगुनिं वया पाकः दाइया नये त्वनेया धन्ना मदुगु खः । वनं छेँ हे थुंबलय् छखें आम्दानी मन्त मेखें बास मन्त । पाकः दाइ फल्चा बाय् जूवन । दाजुया मायां छकः नेपाः वनाः बन्दोबस्त यायेगु वया बिचाः । निलां वयातः नेपाःवंके हे ब्यूगु मखु ।

थौं फेसबुकय् थ्व किपाः खनेवं हर्षं मानं थःम्हं थःतः अपराधी ताय्कल । मानवता हे तंम्ह थें ताय्कल । वया हीनताबोध जुल । अनायास नुगः मछिनां मिखां ख्वबि वःगु हे मचाल । मनंमनं तुरंत हे ब्वयावने माःथें तायेकल । तर छुयाये वं स्यू निलां वया खँ न्यनी मखु । वया मनय् धौबजि वाल । काचाक्क छु बिचाःवन । गुगल सर्च यात । नेपाःया बृद्धाश्रम, अनाथाश्रम त आदि या । लुइकल छगु चलय् जूगु नां जाःगु बृद्धाश्रम । भाइबर कन्ट्याक्ट यात । फेसबुकय् च्वंगु फोटो, थायबाय फुक्क छ्वल । म्यानेजर नापं कन्ट्याक्ट यात । छु छु खँ ल्हात मस्यु । वया बल्ल मन च्वंथें याउँक सास ल्हात । थ्व खँ निला यातः छुं हे मधायेगु क्वःछित ।