त्रासया दथुई इमेलं मवंगु जिगु चिबाखंं “त्रास”

शरण ज्यापु हरि
च्वमि

त्रासया दथुई इमेलं मवंगु जिगु चिबाखंं “त्रास”

इतिहास न्हंका न्हंके फैमखु । मनु त्रासय् बुइ, अले बुसांनिसे हे त्रासय् ब्वलना त्रासय् हे तनावनि । जि जक ज्यूसा थ्व खँग्वयात खँग्व धुकू नं हे लिकाये मास्ति व । मचाबलय् पञ्चायतया त्रास, भतिचा तःधिक जूबलय् बहुदलया त्रास । अनंली माओवादिया त्रास । गुब्लँय् जुजुया त्रास । थौकन्हे गणतन्त्रया त्रास । न न्ववाये दु न च्वय् दु ।

गुब्लँय् प्रकृतिया त्रास खुशिबाःया त्रास, भुखाचिया त्रास आदिं आतंकित जूगु हे खत । जु जुं थन थौंकन्हे थ्यंक वल कोरोनाया त्रास । लखौलख मनुत थुकिया हुनिं तनाच्वंगु दु ।

थुकिया दथुई वल थुकिई हे दुबिनाः बाखँ धेँधेँ बल्लाया त्रास । बाखँ च्वईपिं दइगु खःला मखुला आख्यानकार मथुरायात नं त्रास । पिकाकः इलोहंयात नं बाखं दुतिनिला मदुतिना धैगु त्रास । थ्व हे दथुई च्यापु झिपु बाखंत दुतिन धकाः सुचं पितबिल त्रास छ्यं तयाः । बैशाख मसान्त तकः दुथ्याकेत इनापया त्रास फेसबुकय् पितबिल ।

ब्यक्ति ब्यक्ति थंथवय् नं खःगु मखुगु कोरोनाया सुचं त पितबिया नं त्रासया वातावरण हयाच्वंगु दु । अथेला मनूत थः हे थुकिं मुक्त जुईत सरकारया लकडाउनया त्रासपाखें उन्मुक्त जुयाः उखें थुखे थुखें उखे वये वने यानाच्वंगु दु । थथे वये वने यानाः कोरोनां उग्र रुप काइला धकाः सरकार व स्थानिय सरकारयात नं त्रासय् लाकाच्वंगु दु ।

जि न छम्ह मनू ला खत, जिके जक त्रास मदुगुला पक्का हे मखु । जिगु जःखःच्वंपिं जिगु किपालु जक खनकि हे त्रासय् लाइगु । छायेकि जि सुथनिसे पिहां वयाः त्रासया दथुई उखे थुखे चाःहिला च्वनागु दु । जिं हे कोरोना ज्वना वलकि धैगु त्रास इमिके दु ।